我個名叫Samkong，個樣就唔係咁似蜜糖噃，哈哈，講起Samkong呢個名，既係本人嘅網名，噉同時亦都係本人嘅英文名嚟咖，“Sam”就係代表本人最愛嘅頭號偶像許冠傑啦，“kong”一來代表網主名字之最後一個字嘅粵語讀音，二來亦係“狂”字嘅粵語發音，Samkong，就有“為Sam而瘋狂”嘅意思嘞。

         喺網主嘅孩童年代，一個相當偶然嘅機會，聽到鄰家播放住Sam嘅《半斤八兩》專輯錄音磁帶，當時覺得啲歌詞好有趣，好盞鬼，好得戚，從此就接觸、認識并特別喜歡聽許冠傑啲歌。之後更借咗鄰居嘅《半斤八兩》專輯盒帶聽餐飽，當中嘅歌曲，我最鐘意嘅就係嗰首《大家跟住唱》嘞，其歡快嘅旋律，優美嘅曲韻，清新嘅歌詞，都令我迅速喜歡了聽Sam嘅歌，從此亦就一發不可收。到咗後來聽Sam嘅《潮流興夾BAND》及《沉默是金》時，已經相當酷愛聽他唱嘅歌曲嘞：無論係阿Sam情意綿綿嘅柔情類情歌，抑或針貶時弊嘅鬼馬類寫實歌曲；無論係催人奮進嘅勵志哲理歌，抑或情真意切嘅香港情懷類歌曲，都打動住我，甚至好多Sam嘅歌曲都成為自己為人處世之人生觀嘅準則，當然亦極為佩服同埋欣賞呢位粵語流行歌壇巨匠天才嘅創作及演唱才華。而呢個時候，Sam就喺我心目中牢固確立咗“至愛地位”，無人可以代替，直至今時今日！

         網主從細就喜愛收藏一啲物品，譬如：公仔書、郵票等等，到咗出嚟賺錢搵食之後，我諗：既然我咁鐘意玩收藏，又如此喜愛阿Sam，何不轉而收藏同Sam有關嘅物品呢？尤其係喺近呢幾年，更瘋狂迷上咗收藏，不遺余力噉去搜集同Sam有關嘅收藏品（以唱片、書籍、紀念品為主），并以此為樂！為搜尋Sam嘅收藏品，廣東及香港地區嘅港九新界各大細唱片店鋪都留低咗網主唔少嘅腳毛，每一件收藏品都滲透住無數心血、汗水及欣慰。

         自2005年阿Sam於廣東地區舉辦個人演唱會以來，好高興結識咗一眾志同道合嘅Sam迷知心友，除組織Fans一齊去睇Sam演唱會外，仲經常參與歌迷嘅各種活動、聚會，Sam話齋：“踏遍天下難求知心友，得到一個做人復何求”。此乃人生一大樂事也！有Sam迷朋友就曾經向網主提過建議：有好嘢，凈係自己收收埋埋實在嘥料，點解唔同廣大同好一起分享、交流吓呢份收藏嘅樂趣啫？不妨搞個網站Show啲嘢出嚟畀大家Look下云云。呵呵，諗落呢個提議又真係唔錯噃！噉就講多無謂，食多濕滯，坐言起行啦，嗱嗱臨即刻開工做嘢嘞……喺呢個網當中，網主將向各位展示一啲與Sam有關嘅收藏品：音頻方面主要包括原版CD鐳射唱片、LP黑膠唱片、錄音磁帶，視頻方面就主要包括Sam嘅演唱會、音樂特輯、電視節目嘅原版VCD、DVD、LD影碟，另外，重同大家展示一啲本人歷年來收藏嘅關於Sam嘅海報、紀念品，以及一啲雜誌、書籍及其剪報等等……可謂林林種種，不勝枚舉，其中就不乏罕有珍品。建呢個網，目的就係要與各位同好分享呢份作為一個忠實SAM迷嘅樂趣，交流珍藏嘅心得，圓一個夢……

         各位Sam迷老友記，如果想了解更多同阿Sam有關嘅收藏資料，更好噉支持、宣傳我哋嘅偶像Sam Hui嘅話，你哋系101%搵啱咗地方喇！熱烈歡迎各位光臨“許冠杰珍藏網”！Wellcome！！

         作為Sam迷，我哋最大嘅願望就係：阿Sam，惟願你與歌迷莫分開，繼續微笑共伴到未來，永遠深深珍惜這份愛！！Love Sam Forever！！

——Samkong
2005年12月28號

網主心聲（Highyun篇）

         Hi，我叫Highyun，個名就冇Samkong咁多來歷喇，不過對粵語有少少研究嘅人，都知道我喺粵語界個朵有返咁上下。冇錯喇，小弟正係“粵語協會”嘅創辦人之一，失禮失禮 ^_^。

         曬完朵之後，都係時候講吓我同阿Sam嘅淵源喇。阿Sam係伴住我長大嘅一位歌手，佢就好似一位睇住我長大嘅親人。

         出世之後，我聼嘅第一首粵語歌——亦係第一首歌——就係《財神到》，“財神到”亦係我哼出嘅第一句歌詞。到我兒童階段嘅成長時期，正係八十年代粵語流行曲嘅興盛期，與童年玩伴玩樂嘅時候，往往會聽到某家某戶嘅窗戶傳出陣陣嘅歌詞：“我哋呢班打工仔，一生一世為錢幣……”“整煲佛跳牆……”“求望發達一味靠搵丁，鬼馬雙星……”……雖然，當時並唔知道何謂“佛跳牆”、“搵丁”，更唔明白咩叫“半斤八兩”、“賣身契”，但已經對呢啲歌有莫名親切感。

         隨住我慢慢長大，聽到更多關於“許冠傑”嘅事情，亦聽到更多更有旋律性，更有哲理嘅歌，諸如《浪子心聲》、《沉默是金》，“許冠傑”呢個名已經喺我心中奠定咗地位，成爲“喜愛歌手”之列。

         九十年代，港產片漸漸向大陸地區開放，我睇到精彩嘅港產片之餘，更深深喜愛上阿Sam嘅《最佳拍檔》系列電影。我第一次知道，原來佢唔單止係一個歌星，重係一個既打得又風趣幽默嘅人。之後睇到嘅《花田喜事》、《合家歡》、《雞同鴨講》等喜劇片，令我除咗更加佩服阿Sam嘅幽默感，亦認識並喜愛上佢嘅兩位兄弟——許冠文同許冠英。“文武英傑”，原來可以四兄弟都咁叻，只不過阿文同阿英嘅光芒被四弟阿傑掩蓋咗。

         到我讀大學時，對阿Sam嘅認識更上一層樓，我開始更全面噉聽阿Sam啲歌。呢個時候，我感觸最深嘅係《印象》、《是雨？是淚？》、《為你》呢類情歌，亦開始了解到阿Sam鬼馬嘅一面後面，重有柔情、内向嘅一面。

         2004年到2005年，包括我在内嘅廣大Sam迷得到驚喜，因爲歌神復出開演唱會。睇過紅館、佛山、番禺三場演唱會之後，我已經從一個Sam迷轉變成一個超級Sam迷，從更深處體會到阿Sam曲中嘅韻味以及歌詞中深刻嘅内涵。喺呢個時候，我有幸認識到“許冠傑音樂聯盟網”嘅一班知音朋友，時時可以暢談Sam歌韻中嘅奧妙，真係人生一大快事，只嘆相逢恨晚……

         我鍾意阿Sam，除咗因爲佢天才嘅詞曲，鬼馬嘅電影之外，另有一個主要原因，就係兩個字：粵語。前面已經講過，我係“粵語協會”創辦人，一直有志于向全廣東、全中國甚至全世界推廣優秀嘅粵語文化，而阿Sam喺推廣粵語上，可謂居功至偉，可稱爲第一功臣。許冠傑乃係粵語流行曲之開山鼻祖，我講呢句話相信世界上冇人會反對，亦都冇人敢反對——即使係唔鍾意阿Sam嘅人。正因爲許冠傑喺香港國語歌唱主旋律嘅大環境下，開創咗自創自唱，以粵語填詞嘅先河，並且作品大受歡迎，為香港80年代粵語流行曲嘅鼎盛時期打落堅實嘅基礎，使得粵語、粵語流行曲成爲全國南北乃至全球追捧嘅對象，粵語喺中國之所以有今日嘅特殊地位，許冠傑功不可沒！

         正因爲如此，我做“粵語協會”網站嘅同時，絕唔可以忽略許冠傑呢個人。喺呢個時候，有Sam狂之稱嘅Samkong正有做一個許冠傑收藏網嘅打算，兩人一拍即合，於是，“你出豉油我出雞”，經過數個不眠之夜嘅程式編寫以及超過一個月時間嘅資料圖片錄入，“許冠傑珍藏網”正式面世！都係嗰句：你哋嘅支持就係我哋嘅動力，希望所有Sam迷鍾意我哋嘅心血結晶。

——Highyun
2006年1月2號凌晨

粵ICP備 05128266 號