有幸去咗6月12號嘅許冠傑演唱會，演唱會開咗4個幾鍾，由於太多嘢要講，一時又未有時間慢慢介紹，所以首先介紹一下當晚發嘅紀念品：

         首先系用嚟裝紀念品嘅紅白藍袋，如果系平時帶住個噉嘅袋出街肯定會好“梁”，但系嗰晚個個都帶住呢個袋入場卻顯得好別致過癮。阿Sam對紅白藍膠袋情有獨鍾，演唱會最有一part都系著住件紅白藍衫出場唱歌。
         第二樣介紹嘅系圖右手邊嘅抵死面具，阿Sam咁大年紀都好鍾意玩，佢話我哋戴咗個面具會玩得癲好多。而且面具附帶一個BB，阿Sam話如果我哋怕羞唔肯帶面具，可以拆個BB出嚟吹。哈哈，啱曬我呢啲怕羞嘅人啦，結果，嗰晚個BB畀我吹到爛咁滯。
         第三樣就系“我要做model”嗰個袋仔裝住嘅嗰條皮帶，阿Sam話怕我哋太入迷太high，會撲出嚟或者唔小心跌親，所以條皮帶可以當安全帶噉用。
         第四樣就系圖裏面擺喺最後嗰個黃色嘅紙袋，阿Sam話齋：“呢個紙袋就巴閉喇，可以當救命袋用。一陣你哋退場嗰陣，如果太多人，唔夠氣透，可以用呢個事先吹漲嘅紙袋當氧氣袋用。重有，如果你哋等陣聽歌high得滯，可以吹漲呢個紙袋打爆佢發洩。”佢剛講完，就聽到“砰砰”聲，好多人馬上打爆個袋。至於我，點捨得喎，梗系留返嚟做紀念啦。
         第五樣中間被遮住咗一部分嘅嗰條黃色嘅膠帶，我開始都唔知有咩用，睇完肥仔許懷谷示範先知，原來用嚟箍住個頭，然後箍埋部手機喺耳邊，噉樣聽電話就唔使用手，可以空只手出嚟拍掌。不過咪話我話啦，演唱會咁精彩，有鬼人得閒聽電話咩。
         第六樣呢，就系左下角嗰條口水氈喇，上面個工仔系唔系好得意呢？阿Sam話，今晚演唱會啲嘉賓咁多靚女，嚟睇演唱會嘅觀眾又有咁多靚女，我哋身邊周圍都系靚女，實會睇到流曬口水啦，所以呢條口水氈好有用架。哈哈，阿Sam真系又蠱惑又周到。
         最後一樣喇，就系放喺最前面正中嗰張相，系阿Sam三歲嘅時候同佢媽咪喺廣州影嘅，當時細路Sam想摘花，相裏面寫住佢阿爸許世昌嘅一句話：“什麼愛都是假的，只有母愛才是最偉大的愛”。可見阿Sam系幾咁孝順，既懷念佢父親，又時刻記掛住母親。
         另外兩樣，一張系盈科賣廣告加推銷用途嘅優惠券，擺落去個袋度唔系阿Sam嘅意思，所以呢度講唔講都罷；另一樣系演唱會嘅門票，我為咗紀念，順便擺埋落去。
         由於我憑記憶，可能有啲細節會有錯，希望有去睇過嘅人指正。

作者：Highyun